最近腦海成日出現2個字好想同大家分享下 － 緣份
話說前幾日返去柳醫生到覆診，講起我面對既困難，但當我覺得好困擾時，我就想起柳醫生教我呢兩個字 － 緣份，好多謝你，一生受用🙏🙏
因為呢個病，識到既醫護，姊妹，一切一切都係緣份，有啲人緣份深啲，做到好朋友，有啲出現一段時間，之後會疏遠左，生命入面，就係會有好多人事物不斷喺我地生命進進出出，所有野都係緣份，每當我想起呢兩個字，我就會鬆解晒啲困擾😊😍🥰
同時亦都令我想起同一位姊妹既對話，好想同大家分享：
呢位姊妹呢，初初唔係好有自信，會好介意人點睇佢，亦都因為童年陰影而對人會不期然好有戒心，保護自己意識好強，佢睇我既facebook page都足足2個月先敢搵我😆
當佢真係鼓起勇氣搵我後，我諗佢都有比我感動到😁，之後佢真係身體力行，同我一齊以生命影響生命，去幫好多新既姊妹，雖然佢有時都會好擔心人地唔知點睇佢，會諗好多假設性既問題，但佢都仍然繼續去幫人，呢份進步，我其實超級感動架。
前排，我開始同佢研究下佛學，我唔係一個好虔誠既佛教徒，但我相信只要向善，其實咩宗教都係好，我地最近討論和而不同，緣份呢個議題，佢自從開始睇佛學書後，佢話個人睇開左好多（呢個係超級大進步），我地大家都好認同就算group入面有好多意見，但大家都可以和而不同，互相尊重，同埋我地就住緣份呢兩字，都表示其實好多野都可以放下，因為一切偕是緣份。
最後，佢有金句好值得分享：無之前既苦，無今日既我，會更加珍惜，有更深切既體會，成就將來更好既我。係你呀！我唔會開你名😆😂🥰 但真係好開心你有呢個改變呀！！
#乳您一起youarenotalone
#惜緣
#緣份
#和而不同