#Bye2025 － 今年有點長文
又一年了，貶下眼就黎確診第7年，亦都係就黎康復第7年，開呢個group 6年多，人多了，除左幫到好多新姊妹，亦聽到好多姊妹既故事，見證到好多姊妹康復，亦都有不幸既姊妹離去，有開心亦有感慨，好多姊妹會問我，會長，你內心真係要好強大，成日接住咁多負能量，知道大家都好擔心我呀😘，我都曾經覺得咁樣係唔ok，於是我搵左一個方法💪😅
－ 我而家盡量每個姊妹傾完，放左佢地入group同姊妹傾後，我就會放低呢個case先，所以我同姊妹講，大家千萬不要刪除我同你私下既whatsapp對話，請原諒我唔記得咁多，因為我實在唔可以記住太多，如果刪除左但之後再PM我既話，我係會唔記得晒，要由頭再講過架啦！！！！咁樣我就唔會背負太多負能量🥰🥰🥰
－ 今年我除左照顧新人外，活動唔算搞左好多，但就多左醫學既talk，我地班姊妹好鍾意學野，好想學多一點點，所以每次搞talk都有70人以上參加，最多有接近100人添呀，好開心見到你地將學到既都喺群組分享，令到大家都不再恐懼，1月初同2月初都會有talk，大家記得踴躍參與啊！
－ 除左搞talk, 今年仲初嘗試受藥廠邀請，去左Amsterdam參加左一個Global既病人組織會議，共有42個國家參與，呢個體驗我從來未想過自己會有呢個榮幸可以參與其中，認識到其他國家既病人組織，學到其他國家既病人組織點樣幫到更多既病人，真係獲益良多。
－ 前排終於搞左個大型活動，就係自費做冬，病左後，每個節日對我地黎講都感恩，所以做冬必須要聚一聚，我真係估唔到大家咁好反應，大家出到黎好似老朋友咁，有姊妹圍埋傾計，有姊妹圍埋畫畫，有姊妹攻打四方城，96人一齊聚會，令我有信心可以每年都搞下，大家支持嗎？
－ 仲有一樣開心事係，有姊妹自發開左個手工group, 由幾位姊妹自發教姊妹鈎織啦，畫畫啦，手工啦，化妝啦，整番梘啦......佢地希望姊妹可以搵返me time同興趣，feedback超好呀！ 為左唔好有利益衝突，場地連導師都會除返一份，你地真係好貼心，真係超級好呀！如果有機構可以提供免費場地，記得pm我呀，等姊妹可以慳返啲麻！！！！
－ 除左個group外，我自己由上年年尾退休後，我就成日周圍去，去左好多地方，又帶左父母去澳洲睇阿女大學畢業，跟住又搵到一份我好鍾意既part time, 係100％ wfh, 所以我去旅行時仍然可以work remote, 同埋我今年終於實行到一星期做三日運動，唔鍾意做運動既我，真係比個叻自己，上年寬寬想我打骨針，我努力一輪後，唔洗打了，叻叻呀我！！
－ 講完開心野，都想講下少少唔開心野，就係都有姊妹入黎後，好返後會PM姊妹做生意，包括有保險，有健康食品／用品，我想講既係，其實姊妹們係唔想呢個咁單純既地方有呢啲賺錢既行為出現，我地曾經病過，都曾經被幫，我希望唔好好返後，就將我地呢到變為一個幫你賺錢既地方，以幫人名義接觸姊妹，跟住就以幫人名義做生意，唉！！！其實我好唔想見到咁既情況，所以我再收到投訴既話，我會直接請離所有我地既群組架啦！！
好啦，講完啦！！bye bye 2025，希望有更好既2026年！！！
#乳您一起youarenotalone
#大家一起健康到老
＃每年最大願望都係想群組執笠
＃2026年見啦