Tiffany的畢業文
恭喜你呀Tiffany, 好想讚你好勇敢去面對化療，Tiffany當時係做左Oncotype DX Test踩界，意思係可做可唔做，久唔久都面對呢類結果既姊妹，的確係好糾結，有邊個想做化療？冇人想做，但唔做又好驚佢失驚無神返轉頭，返轉頭有時唔係咁簡單，所以唔想做但唔想後悔去做，係需要特別大既勇氣，而你好勇敢咁做左個無悔既決定，真係好唔容易，你提到完成治療後開心的流淚，我都的確好明白呢個心情，記得要好好多謝自己，我成日教姊妹要望住鏡中既自己好好咁多謝自己，亦都要多謝身體各器官既配合，先可以好好咁行到呢步，好似好低B咁，但我覺得身體同各器官都收到我地既感謝，跟住會好好咁繼續同我地並肩作戰，以後會健健康康。
Tiffany, 好返晒架啦，我地繼續手拖手健康到老呀😘😘😘
************************************
今早完成電療後，放射治療師就同我講：「你畢業喇！」🎓
我當刻好傻仔，流了眼淚，哈哈😬 其實，今日係開心嘅，先生陪我去電療，完成電療後，我哋去買咗份小禮物，然後一齊去咗食西餐。
入正題，首先，我要多謝會長Jacqueline 係我最無助、面臨崩潰嘅時候，加我入group, 令我可以係呢個充滿愛心、正能量嘅地方勇敢面對抗癌之路。衷心感謝Ada Cheng, Yee, Eds, Fion, Gloria 及其他姊妹不嫌其煩解答我嘅問題, 同時亦給我很多鼓勵、很多寶貴意見。另外，請原諒我時常放負。總之，真心感激沿途有你哋每一位相伴。
嚟緊嘅日子，我會重新思考自己嘅人生，更要提醒自己，好好愛自己，與家人、朋友開心過每一天。🌈
仍在治療中嘅姊妹，治療路係辛苦嘅，但無想像中咁苦，記著，凡事都「會過去的」，祝你們一切順利，大家會一路互相扶持，加油！💖
#乳您一起youarenotalone
#乳您一起畢業感言
＃化療經歷
#以生命影響生命
＃確診時感受