Polly既畢業文
見到Polly既畢業文話我既一句抱抱你係比到力量你，亦令你終於可以發洩到情緒出黎，唔知新既姊妹有冇同感，同路人一句加油，一句抱抱，同家人，朋友講既係好唔一樣既感覺，係好有力量既鼓勵💪
Polly，今次我又想比個抱抱你，第一次比個抱抱你係想比力量你，鼓勵你，明白你，而家比既抱抱你係讚你，好努力，好叻女，做得好好，成日話呢個病係上天叫停我地，叫我地要好好咁檢視人生上半場，見到你既畢業文，我知道你明白左上天既旨意了，我地繼續手拖手走人生下半場，健康到老呀！！！
＊＊＊＊＊＊＊＊＊＊＊＊＊＊＊＊＊＊＊＊＊＊＊＊
終於我可以寫畢業文啦，
回想整個個打仗過程，由手術、化療、電療一步一步咁打仗，步步為營。
隔左9個月，終於完成了✅
第一，感謝會長Jacqueline加我入group, Jacqueline 係我第一個經歷乳癌既過來人同我傾計，所以好多野都明我感受同經歷，好印象深刻聽到佢一句既「抱抱你」，自己儲咗好耐嘅情緒終於爆發出嚟，喺屋企無端端爆喊。
第二，感謝you are not alone的姊妹既無私分享，雖然我哋素未謀面，喺我治療過程中，知道場仗點打，你地既無私實在難能可貴。
第三， 感謝我老公，佢履行左結婚時既誓詞，「無論健康或疾病，我將永遠愛你，對你永遠忠誠」，照顧好個家同工作，令我安心養病。
第四，感謝我父母，在我住院時天天煲湯煮嘢食嚟探我。化療時，佢哋由新界出港島，幫我照顧女兒，令我可在家休息。
仲有多謝屋企家僱姐姐，照顧我女兒同時照顧我！在英國既哥哥，佢剪個skin head支持我，同我一齊剃頭，準備化療。
雖然我沒有宗教信仰，但在治療期間，有一句經文常在我心: 喜樂的心乃是良藥。
準備治療既姊妹，記住樂觀面對，一定會事半功倍打贏場仗💪💪💪
祝大家身體健康，幸福美滿，繼續手拖手一齊行到老🫶🏻🫶🏻 愛大家🫶🏻🫶🏻
PS: 張圖源自「我的海盜媽媽」繪本，我在患病成日講依本書比女兒聽，比喻媽媽去出海打怪獸😉，特此紀念。
＃乳您一起youarenotalone
#乳您一起畢業感言
＃化療經歷
＃以生命影響生命
＃確診時感受