#我終極畢業啦
#2024年5月31日, 我終於 #完成長達5年多既治療, 唔知聽日我會唔會不自覺搵AI食呢? 唔知冇埋呢個金鐘罩真係靠自己會唔會好失落呢? 但點都好.......um........我真係好感恩, 好感慨, 好感動同埋好感謝, 2018年底一次既body check, 就改寫左我人生, 失去左健康既傷痛同悔疚, 冇令我放棄同沉下去, 反而令我 #反思人生, 感恩個天比左一次機會我, 我要點樣走我既第二次人生呢?
初初確診時, 嗰種徬徨無助, 崩潰, why me, 世界末日, 癌症喎? 點解會發生喺我身上? 我明明仲好後生又有餵人奶, 我會唔會死架? 百感交雜之際, 我遇到喺網上認識既大Win, 當時你既關心, 問候, 加我入重新出發group, 入面有十幾個師姐帶住我呢個唯一新人時, 你地既教導, 提醒, 拋出呢條救命繩真係救返我, 呢份恩情我呢世都唔會忘記, 亦都因為你地既大愛, 成就左我創立左 #乳您一起youarenotalone 呢個群組, 以生命影響生命, 由你地十幾人去救我, 再由我去承傳呢份大愛, 不知不覺已經有8XX人, 感恩!
呢5年入面, 我一直都保持初心咁去幫人, 但當中都有感慨既時侯, 例如有朋友亦係姊妹背後惡意中傷, 亦有以為佢係支持我理念去幫姊妹, 原來背後又會不停講是非, 可能女人多既地方就會有呢啲野出現🤭🤭 從前我一定會好唔開心, 覺得自己一定做得唔好, 所以有人咁對我, 但病後我學懂唔好放大喺唔係事實既地方, 應該放大喺認同你既人, 欣賞你既人身上, 做好自己, 問心無愧就得🥰🥰
呢5年幾入面, 好多感動既地方好值得我回憶, 見證住幾百人畢業, 好返, 回復正常生活, 見到你地既覺醒, 過更精彩既第二次人生, 有啲姊妹同我一樣寫page, 一齊去幫人, 亦有我既朋友, 醫護睇完我page, 明白多左病人既需要而更懂得去關懷病人同珍惜所擁有, 我一出聲搵某啲姊妹去幫手分享, 同你地講唔該時, 你地會回應我一句應該的, 好多姊妹一齊互相扶持, 一齊去承傳, 好返後都會留喺group繼續分享, 你地每一個肯分享既, 我都好感激。好記得疫情期間, 有單位sponsor左我地口罩, 磋手液等等既物資, 我call班姊妹幫手派送, 首先送晒去我到, 我再送去比分區leader, 再由分區leader送去比姊妹分派比同區姊妹, 短短三日內完成, 有姊妹仲係做緊治療都去幫手, 仲有你地每一次講入到黎呢個group真係好幸運, 好幸福時, 每一個既道謝, 支持我理念既人, 都令我好感動
感謝我父母, 老公, 仔女, 兄弟, 家人, 朋友既支持同鼓勵, 冇你地係冇可能順利完成呢個漫長既治療, 特別係我老公啦, 佢唔單只不離不棄, 仲好支持我去幫人, 出心出力, 有時要車野比姊妹, 就算我地由柴灣去到屯門, 佢都話車去啦, 唔好叫姊妹拎咁重, 我相信我地未來會繼續做個簡單, 唔計較既人, 繼續去幫更多既人
另外好多謝我兩位救命恩人 - 兩位主診醫生, #柳漢榮醫生 #張寬耀醫生, 多謝你地救返我條命, 令我可以過不一樣的第二次人生, 多謝我既牙醫家姐Aileen比個優惠價我地姊妹洗牙, 我既髮型師Jeff & Candy, 幫好多我地姊妹剪個型髮型甩假髮, 令佢地有返自信, 仲有各藥廠全力支持我地舉辦活動比姊妹, 拍宣傳片.......好多謝你地既支持同認同, 仲有仲有要多謝咁多位姊妹, 係你地搵我, 係你地互相扶持, 係你地一齊去承傳, 我地先可以行到今日.
最後, 最後, 我要多謝自己, 呢5年成長左不少, 覺得上天比呢份功課我做, 同時亦都比左好多禮物我, 認識左好多醫護, 好多藥廠同事, 好多乳癌知識, 明白到病人感受, 家屬既感受, 同得到好多姊妹既友誼。上星期同左班姊妹去左台灣快閃3日, 佢地仲同我預早慶祝畢業, 呢3日充滿笑聲, 同班後生女玩, 連我都覺得自己年青左, 以後我會健健康康生活落去同埋努力幫更多既人!!
呀! 好重要唔記我講😁, 我打破左食AI既不瘦降, 經過幾個月努力咁注意飲食, 做運動, 我已經瘦返20磅啦, 會繼續努力, 希望可以去返食AI之前既磅數啦! (不過好難)🤭🤭
多謝收看