醫護。病人。尊重 (長文）
我諗左幾日好唔好寫呢篇文章, 但我都希望有機會為姊妹發聲, 講下我地四期姊妹既感受同遭遇🥺
作為一個癌症病人, 我地心靈其實好脆弱, 醫護既一句說話已經足以將我地打落谷底深淵, 一句說話已經令我地耿耿於懷, 就算旁人幾多既鼓勵, 幾多既分享, 呢一句說話就會不停在腦內出現, 特別係我地四期既患者, 佢地要面對好多野, 自己個病可唔可以醫好? 仲有幾耐命? 屋企人點算? 龐大既醫療開支, 經濟壓力, 自己既將來......佢地已經無限個憂慮🥺🥺🥺
我明白, 醫護見盡世事, 好理性明白晚期患者情況隨時有變, 到最終都係會離開 (其實人就係經歷生老病死), 但我地都希望能夠被尊重, 被鼓勵。喺我地病人眼中, 醫生就係我地唯一既倚靠, 唯一既希望, 而我地既信心, 情緒都可以好影響我地既用乜野態度走下去, 就算明知生命正在倒數, 我地都希望係平安, 無悔, 盡左力而離開, 大大部份私營既醫生都好肯鼓勵病人, 當然可能我地係客仔, 我亦認識有私營醫護係好真心想幫病人, 而公營呢.....當然我都遇過公營好好既醫護, 但唔知點解有部份既醫護真係特別鍾意打擊病人。
病人既心聲: 我地都唔想病, 唔想睇住自己生命倒數, 病人係體諒醫護忙同辛苦的, 病人都盡量配合, 我地尊重你地既同時, 希望醫護都尊重返我地🥺 唔係叫你地明明晚期都話我地冇事, 其實你地只需要話明白你地辛苦呀, 副作用幾日後會好點, 我可以開啲藥幫你, 唔好放棄, 我地一齊努力!! 呢啲說話就夠令我地安心架啦😊
好似一個姊妹, 轉移上腦, 醫生之前要佢電療, 電療完可以比佢自費買藥, 電療前又突然話佢冇藥可醫, 唔會開藥, 個腦瘤隨時會爆, 跟住就會死亡架啦!🥺你講得好輕鬆, 好輕描淡寫, 但知唔知對我地傷害幾大? 係唔係可以話我地電左個腦先, 睇下成效, 我地再決定下一步點做, 放心, 我地一定會盡力💪🏻
另一個姊妹既經歷係, 你HER2第四期架啦, 冇得醫架啦, 雙標平均一年就會抗藥性, 轉另一隻藥大概都係維持4-6個月都係抗藥架啦, 跟住就冇藥醫, 等時間架咋, 你四期唔會好返架啦, 我地最多比嗎啡你止痛😖😖. 係唔係可以話而家HER2都好多武器, 我地盡力試左先, 之後再檢討下下一步點做, 一齊努力💪🏻
我地之前離開左既Carmen, 佢就遇到公私營既好醫生, 成日鼓勵佢, 佢成日都好感恩遇到好醫生, 雖然最後佢都係要離開, 但佢無怨無悔了!
我希望大家都想想, 如果發生喺你地既屋企人身上, 你地係唔係都會咁講? 希望大家都將心比己, 講幾句鼓勵說話唔會令你地少左忽肉😉 但對我地係極大既安慰😊💪🏻
我地晚期既病人一日未斷氣, 一日都係人, 比返啲尊重可以嗎?
#乳您一起youarenotalone
#醫護與病人
#尊重
#以生命影響生命