Silver既畢業文
Silverrrrrrrr😍😍😍好開心，好開心，好開心睇到你畢業文，你真係完成左一個不可能的任務, 證明母愛真係可以戰勝一切, 你同BB唔係一般既叻，係超級無敵叻，當初知道你懷孕3個月，我心入面都好擔心，係唔係真係得呢？但為母則強，我相信盡力行，無悔咁行，結果唔好諗，心入面即諗起Joanne，Joanne都係懷孕時確診, 佢好樂觀同埋識好多野，同埋Joanne好有幫姊妹既心，所以我深信佢一定幫到你，睇住你一步步行，到生bb, 再完成化療，到完成電療，好叻好叻，好返架啦！我地group其實都出左幾個懷孕媽媽確診做治療, 仲生左健康既BB然後繼續治療添, 一齊比大力既掌聲比呢班super媽咪!!👏🏻👏🏻👏🏻我地要繼續手拖手健康到老啊😘😘😘💪🏻💪🏻
***************************
Halo 我係silver
懷孕3個月發現有三陰乳癌二期
經過手術8次化療，25次電療
我終於畢業拉🙆🏻♀️
好記得開頭發現左自己有乳癌個種感覺，真係以為自己會死又要切左個胸好傷心好徬徨🥲亦要面對好多負面情緒，身邊好多人叫我吾好要個BB
由於我懷孕個案比較特別無咩醫生肯接我，叫我去返政府安全D
周圍見醫生好頻撲，個段時間每日都好擔心🥺
每日夜晚就上網睇下有無案例同我一樣
雖然有成功個案，但黎緊既療程會點做d咩會有咩反應一無所知會吾會影響bb
有好多既問號係個腦到，日日睇埋重覆既野😣但完全安心吾到訓吾到
終於有一日我見到有位姊妹分享左畢業文
我就揾到you’re not alone，之後會長jacqueline就加左我入GP
入到GP既姊妹關心我仲多過我D朋友
我個心真係定左好多，以前覺得做化療好會好似睇電視咁辛苦🥶原來都無想像中咁辛苦，好有胃口無瘦到仲反而肥左🤣
搞到我自己都吾覺得自己有癌症😂
而且科技真係好進步原來依家技術係可以局切亦都無諗過有左都可以做化療
真係多謝會長加左我入GP介紹左Joanne比我識🙏🏻真係真係真係好多謝你Joanne
說服左我先生比我係私家到做療程
分享你既經歷令到我無咁驚可以安心治療🥹仲比你仔仔既相我睇鼓勵我
如果吾係你我吾會得到咁好咁舒服既治療方案同埋遇到咁好既醫生
亦都好多謝sandy 教識左我好多野同埋其他姊妹一直以黎都好關心我解答我所有難題🥰
雖然我做左Cold Cap 但尾2針頭頂既頭髮都頂吾到去最後😭個陣都好傷心，
先生都為左剷咗光頭，真係好感動🥲
本身想放棄做Cold Cap 多得姊妹既鼓勵
我最終都完成埋療程，完左療程真係生得好快🙈依段時間屋企人都好支持我
屋企人雖然好擔心但都支持我決定
我知佢地都好擔心，但冇表露到出嚟
又要驚我個病又要驚個Bb生出黎吾知會點，到我生完之後都幫我揍BB，令到我有足夠時候休息🥺
我以前成日諗吾開，仲有社交恐懼症同容貌焦慮症，雖然依家都仲有小小😂
而且係一家既經濟之柱比好大壓力自己
每日都為工作揾錢而活🥴
治療途中我都好驚我之後個5年會復發
成日好焦慮🤯不過依家吾諗lu，
未發生既野擔心都無用，最重要開心
開心情緒真係良藥黎，患病之後令我睇開左平靜左好多，停左洛黎，享受生活，放鬆心情，珍惜現時擁有嘅一切🥰
用感恩嘅角度去睇每一件事，只要活著就無係係做吾到🙌🏻去學習樂觀咁面對所有事
比著以前我會覺得我好黑仔29歲就有癌症
仲要懷孕患有癌症係100%既人只會有3%我都中左😩但依家我會諗係好慶幸
我因為懷孕發現到癌症而且無擴散到
加上懷孕第一週期係吾可以做手術同化療
我係岩岩好踏入左懷孕第二週期可以做到手術再化療順利保住個BB👼🏻
亦都好感恩我保險朋友由我發現癌症即日安排左我見醫生等左三日就可以入院手術
係治療途中又中過COVID同鼻竇炎
到出世個陣因為我身體水腫要全身麻醉
BB總共陪左我全身麻醉左兩次又食左好多藥
佢可以健健康康出世係我最大既幸運係上天賜比我既禮物，每日見到佢既笑容真係解決晒所有問題👼🏻
依段時間多謝各位姊妹既幫助同鼓勵
祝大家都健健康康開開心心繼續享受人生❤️
#乳您一起youarenotalone
#乳您一起畢業感言
#化療經歷
#以生命影響生命
#確診時感受