Alice既畢業文
打仗可以嬴完一次又一次的, Alice就完美演譯呢件事, 當Alice黎搵我時, 我知道佢幾年前既情況時, 心入面都好難過, 我好記得我當時即刻話call佢要同佢傾, 要比正能量佢, 要佢快啲企起身, 佢真係好叻女, 真係好快企起身去接受呢件事, 繼而心口掛個勇字就向前衝, 有時冇得選擇時, 反而令到我地更清晰, 更決斷去向前行, 雖然今次既治療都幾長, 要年幾既時間, 但係你都真係沉住氣, 順利完成.
好多謝你講比我知, 我地啲group除左帶來資訊, 仲可以帶來正能量同埋歡樂, 令到做緊治療既你可以輕鬆面對, 祝福你有個好精彩既第三次人生, 我地繼續手拖手到老
*****************************
Hello ，我係Alice。今年既三月我已經完成晒所以療程， 但由於家母有病在身，所以忙於照顧…到左今日終於有時間寫我既畢業文啦！
雖然遲左，但都要講一句「 我 畢 業 啦 ！」。
首先我要多謝我自己，因為原來自己係比想像中樂觀、勇敢同堅強。
然後就一定要多謝我既屋企人同朋友(特別係我最親愛既媽媽), 無佢地既支持同支援, 我根本無辨法捱過。
由懷疑、確診、檢查、手術… 到術後既化療、電療加雙標靶, 完成所有療程足足一年半。
回想起2021年9月30 日確診果一刻，我就立即問「點解又係我?」。
無錯，「又係我」。因為5年前，我得到好少人有同比較罕見嘅胰臟腫瘤(內分泌神經線瘤) , 當時已經做左一個超級大手術。
所以係確診果一刻，我立即爆喊。
不停問點解又係我？ 自問我係一個不煙不酒，生活尚算正常既人….
但經過一個鐘頭既消化我就開始接受現實，跟住私家醫生安排既就一連串檢查同排期約見政府醫生。
由於我個情況比較特別, 所以我選擇係政府醫院度做手術同術後治療。
而喺等待做手術嘅呢段時間，多得我表妹係Facebook搵到You r not alone 專頁，佢睇完之後就話入面啲內容好正面，不斷推介我一定要睇同加入佢哋嘅群組。
於是係佢”強迫”既情況下入去睇， 睇完發現入面既內容真係好正面，於是我就膽粗粗send msg俾Jacqueline會長。
會長當晚好快就回覆左我，仲同我傾咗好耐電話了解我嘅情況。由於我嘅身體狀況比較複雜，所以憂慮同恐懼亦都比較多。但會長將療程產生嘅唔舒服講咗俾我聽，聽完令我個心反而定咗好多…
加入咗group之後我發覺入邊啲姊妹大部份都好正面，而且當我呢個新手好多嘢唔明發問嘅時候，好多姊妹都會立即回覆，俾好多資訊我(無論係藥物資助，如何處理療程所帶黎既不適等等)
手術
11月1 日入院
11 月4日出院
(手術過程非常順利)
化療+雙標靶
完成手術後, 12月中就開始化療+雙標靶 (同步進行)
(非常感恩係化療+雙標嘅過程中都無太大嘅不適…只係骨痛，嚴重肚痾同味覺改變較嚴重，其次較輕嘅副作用(甩頭髮、盤骨痛，爆瘡，爛手，手腳腫脹，胃脹等等…) 就所難免, 但起碼過程中無嘔過，都仲食得瞓得, 就當一場重感冒吧 !
電療+雙標靶
15次電療同餘下14次雙標靶
(沒有太大既不適)
經過一年半嘅時間，終於係2023年3月20日完成全部療程。
再次多謝Jacqueline會長開咗呢個專頁，令好多同路人可以聚在一起，互相鼓勵互相支持。
雖然大家素未謀面，但有着類似經歷….有唔明或者麻煩，一提出總有人試著為自己解決問題或為自己加油。
旅程雖然艱辛, 但旅途中遇到大家, 令到旅程行得輕鬆好多，容易好多。
多謝各位 !
感恩上天賜我第三生命同遇到大家，希望自己同大家都一直健健康康，病魔遠離我地……手牽手活到老。
#乳您一起youarenotalone
#乳您一起畢業感言
#化療經歷
#以生命影響生命
#確診時感受