Joanne既畢業文
Joanne妹妹，先比個大大既擁抱你，前排一齊出嚟食飯，當你講細個既經歷時，見到你流淚，廿幾歲就有咁多經歷實在唔容易接受同行過，我都眼濕濕，今次係你最後一次病架啦，你以後都身體健康，唔准再病，知道嗎？
我地group既姊妹真係好堅，你係其中一個非常堅既女仔，有時我覺得天父比乳癌我地，唔係想我地死，係要我地跌得夠痛，去檢視人生，我相信你今次覺醒了，第三次人生😘😘祝福你以後都身體健康，開開心心，5年後我地可以見到可愛又肥肥白白既小Joanne, 一齊手拖手到老😘😘
************************
長文慎入！😂
今日打埋最後一針標靶，終於到我畢業啦🥹🥹
諗番起上年臨結婚前兩個半星期 做婚前檢查發現然後再確診，我用一日時間消化件事。當時馬醫生同我講8成機會係原位癌，所以我唔驚做手術，唔怕全切重建，因為我知道切走哂就冇嘢，我繼續搞結婚，去到做手術個日都係輕鬆輕鬆鄧梓峰😂😂😂
到聽術後報告，同我講有0.7cm走出嚟變一期，要做化療同其他後續治療。我個人即刻好崩潰，因為原本計劃我做完手術就離開香港。由確診到手術我都唔驚，但一聽到要化療我成個人就好驚好抗拒 醫生點講點勸我都唔接受。好記得個日聽呢個消息嘅時候我重喺病床，即刻激動到流多咗血水喺個引流倒，又扔公仔落床。😂😂😂
啲人成日話癌症會令你有第二次人生，但我係第三次人生🤭🤭因為11歲有過骨癌，做咗30幾40次化療，每次一落藥就要即刻搵個兜嘔，嘔到黃膽水又有，嘔到出血又試過，我都歷歷在目。所以我好驚 好怕化療，一聽到都成個人震哂。睇第一個腫瘤科醫生同喺馬醫生倒覆診個陣，佢哋都勸我要做化療 但因為之前有咁樣嘅經歷，我真係唔想做。🤧
好感恩喺最後決定留喺香港醫嘅時候遇到寬寬。佢同我講後生就要做盡佢，唔做化療不如齋食荷爾蒙藥，連標靶都唔好打，定期檢查就算。同時佢同我保證有粒好強勁嘅止嘔藥，唔會好似十幾年前咁辛苦。佢話如果真係想嘔，會扑暈我🤭🤭🤭🤭 好感恩真係冇嘔過，重要好大食 愈食愈重😪
同時好感恩俾我搵到呢個grp, 俾我同會長傾偈☺️會長同我講仲後生做埋化療有著數，同埋四針好快過。加上傾開先知會長都係搵寬寬，所以我最後都係決定喺寬寬個倒做化療😂
好感激好多謝grp嘅每一位🙏陪我渡過每一針 每一個難關。 多謝Jacqueline 會長成日都搞唔同嘅活動俾我哋； 多謝Ada 同其他3.0嘅姊妹成日好快解答我嘅疑問；多謝Carmen 喺威爾斯一齊等藥單傾偈；多謝Mavis 成日有好嘢都益我😂😂，多謝首領Joyce見都未見過就帶我食好嘢去威😎🤭🤭🤭 多謝Mody 耐唔耐就send 啲bb相出嚟解悶🤭🤭… 重有Katie, Kim,Cynthia ,Yee等等好多位素未謀面 好似網友嘅3.0,Her2同吹水grp嘅姊妹令到我整個過程都唔孤單
當然好感激我老公輔導我嘅情緒，成個過程都照顧我 等我食飽就瞓🤭🤭 為咗唔想我媽擔心,所有嘢都我老公處理 ，發脾氣壞情緒都佢食哂
第一次病要我重新學識行路，第二次病要我學識放鬆，唔好俾自己壓力，處理好情緒。廿幾歲嘅我學夠了，而家只係有一個諗法 開開心心 身體健康之後五年後停埋荷爾蒙藥 就可以生一個肥嘟嘟嘅BB🤭🤭
#乳您一起youarenotalone
#乳您一起畢業感言
#化療經歷
#以生命影響生命
#確診時感受