Carmen妹妹既畢業文
呢篇文係由我代筆, 因為Carmen妹妹昨天已返回天家, 呢個愛笑, 心地善良, 好有藝術天份既小妹妹喺上年搵我時26歲, 當時佢話比我聽佢20歲就第一次有乳癌, 佢好乖咁做晒所有治療, 但唔好彩2年後骨轉移, 再之後肝轉移, 佢搵我係主要呢位貪靚既小妹妹唔想再一次面對甩頭髮, 因為cold cap而搵到我, 佢當時話佢一直都好抗拒接觸同路人同病人組織, 因為好少好似佢咁後生, 但佢見到我地既畢業文覺得我地係唔一樣, 真係充滿正能量同活力既一個group, 入左後佢識到好多後生既姊妹, 亦都識左一班都係用cold cap既姐姐Auntie, 你講得岩, 你係好抵錫, 所以我地個個都好錫你. 我地有幫Carmen開生日會, 同佢慶祝生日, 只要你一down down地, 我地又即安排出黎食野, 陪你去海洋公園, 我地原本約定去深圳但最後成行唔到, 唔緊要, 你喺天堂探路先, 第時我地搵你時, 你要帶我地去玩啊!
Carmen曾經講過, 佢咁盡力去醫, 係因為佢可以好自豪咁講, 起碼我盡左力, 我無悔!! 呢句說話出自你口中, 絕無誇張, 每次轉藥, 抗藥, 喊過又企起身再轉藥, 差不多所有藥都比你用晒, 你就係有呢份堅持, 直到最後一口氣, 你冇放棄過, 小小年紀就咁成熟, 目標清晰, 令我十分敬佩, 你仲喺前幾日領洗, 我相信天父比你既任務, 你已經完成了, 所以佢接你返去嘆世界, 唔洗再痛苦啦, 而家喺天堂平靜又舒服咁看守著所有你愛既人.
Carmen, 我地唔會忘記你架, 你一定已經做個快樂小天使, 我們天家再聚!
P.S. 幅畫係出自Carmen手筆, 好靚, 前排仲有喺畫展展出
#乳您一起youarenotalone
#乳您一起畢業感言
#會長代筆