Mody既畢業文
Mody......Big Big congrats, 終於等到你既畢業文, 真係有驚無險到畢業, 當時知道你肺炎, 我同Ada都好擔心, 真係好擔心你有轉移, 又唔敢咁直接講, 我成日煩住你搵你, 因為要睇下你點, make sure你有進展, 因為以前有一位姊妹我覺得自己跟得唔夠好, 最後我地搵到佢既時侯佢已經講唔到野了, 呢件事我真係好遺憾, 所以我同Ada都好擔心你, 好彩最後你冇事, 仲完成晒治療, 好鍾意你既檢討過去, 我地要過更精彩既二次人生, 一齊手拖手到老啊😘😘😘😘
*************************************************
終於到我寫畢業文啦😍! 真係長文慎入😆
早2日完成埋最後一次電療，感覺真係一身輕! 雖然之後要繼續食藥，但最難捱的時間已經過咗😭
回想呢8個月，真係好似發咗一場夢咁，開頭時間過得真係好慢...當時生完bb本應係享受天倫之樂，完全無諗過呢個病會發生係我身上，好彩之前有2胎嘅經驗，總覺得餵奶後有唔妥，一出院就即刻去做檢查，bb未滿月我就確診了，心情由天堂跌落地獄😢 多年來成日幫客人攪賠償，真係無諗過我自己咁快就要claim危疾...
確診後夜晚瞓唔著想搵醫生資料，撳撳下電話就search到會長 Jacqueline 嘅文，即刻inbox 會長，好記得當時會長準備上機，佢都打比我安排我入谷(真心感恩遇上會長，好多謝會長開咗呢個谷♥️)，入谷後先知原來咁多成功例子，好多堅強又正面嘅姊妹... 多謝Tina當晚就打比我同我傾計開解我，多謝Joanne以佢自己個case鼓勵我仲成日係化療時探我，多謝Ada, Anita & Nicola 經常專業分享，多謝Cynthia 嘅正面又攪笑嘅鼓勵，多謝Mail係我肚痾時救咗我😂多謝阿儀,首領,Sammatha, Katie,Kim, Joanne, Josephine, Goldie,Yuki等等吹水谷＆3.0& cold cap谷嘅姊妹，就係因為治療路上有你地嘅陪伴同鼓勵😘，教我副作用見招拆招，慢慢放下恐懼正面面對，時間不知不覺過得好快。
化療期間，深深感受到家人真係好錫我，好照顧我同bb，特別係媽咪同爸爸，佢地一把年紀仲要照顧我轉頭，我知佢地心理上都好大壓力，要報答佢地我就要快d好返💪🏻。但因副作用影響情緒有時好低落又會諗埋一邊，多得有朋友，同路姊妹同老公開解我先好d。
去到化療最後一針前，上天又比個考驗我，中咗肺炎入咗ICU，個刻我仲覺得無乜事嘅，但原來真係有朋友係治療期間死於肺炎，突然覺得距離死亡好近，我知道好多朋友為我祈禱為我憂心，令到家人朋友擔心，我都好內疚😔... 幸好最後順利出院💪🏻！
呢段時間其實都有工作要做，幸好有好同事一直幫手，又有朋友幫我帶小朋友出去玩，仲有家人照顧我同bb起居飲食，連工人姐姐都好盡力照顧我，我先發覺原來我身邊係咁多天使 ♥️
呢個病令忙碌咗咁多年嘅我停下來，或者係個天提我要改變一下，多點重視自己嘅身體愛自己，咁先有力去愛身邊嘅人，無乜嘢比健康更重要！心靈健康都係，經過呢幾個月學會不要事事執著，hea活下人生也不錯🤭
最後，我要多謝好愛我嘅老公，每次治療睇醫生都會陪我，又要照顧我同小朋友，呢段路上真係一位神隊友，係我嘅出氣袋，又係我嘅樹窿，仲係我嘅專屬按摩師😂
我希望以後能夠同我老公，我家人，仲有各位姊妹，一齊手拖手變老，一齊健康到老❣
#乳您一起youarenotalone
#乳您一起畢業感言
#化療經歷
#以生命影響生命
#確診時感受