小草既畢業文💞💞💞
Big big big congrats, 睇到我眼濕濕，以為再冇姊妹寫畢業文🥺 我一直知道你係無條件撐我既其中一位姊妹，每次我搞talk都好驚唔夠人去時，你會黎撐我，唔只我係你既天使，你都係我既小天使啊！見到你既經歷，又幫我打氣要繼續努力去幫人，我所做既野係有用的💪🏻💪🏻💪🏻
我地要開開心心，健康到老呀！
************************
*輪到我畢業喇！🎓*
「抽針化驗報告出左係 Cancer... 」當刻一手緊握住另一半隻手，一邊強忍住眼框嘅淚水，腦海中不其然出現無數個問號，未及回過神又聽到：「你有 cancer，明白嗎？ 係癌症呀!」
「我知吖！（有D勞氣）點解係我？咁我要做D乜？」雖然明白醫生係有責任令病人清楚瞭解自己嘅身體狀況，咁樣 break the bad news 嘅方式真係唔係好接受到。幸好之後嘅治療路上再冇遇到比呢次更差嘅經歷，又或者我已經適應左習慣左， 遇強越強，唔再當呢D係乜嘢一回事卦😆
因為親人有病史，根住落黎決定手術方案確實係糾結左好耐，重建手術複雜康復期長但有公家嘅配套方案同醫護悉心照顧好順利就過左第一關。點知原來，原來... 原來一切好戲真係留在後頭！
2022年2月新冠疫情最嚴重嘅時候冇辦法準時開到第一針，點知屋漏偏逢連夜雨等到臨見醫生前又中埋covid，搞到錯過左黃金開針期；到開到又唔知第一針會加重份量所以冇乜心理準備，所有不適反應齊齊出現報到，連續4日瞓唔到覺嘅感覺係行屍走肉，更好嘅心態都敵唔過呢D突然其來嘅折磨。我終於屈服了，知道靠自己一己之力係撐唔到落去，喺網上用關鍵字搜尋到Jacqueline 會長為同路人姐妹開設嘅 You're not alone 群組! 就係多得呢位小天使拉我入Group，比左呢個救生圈將我由深淵之中拉返上黎。喺群組姐妹講同一番嘅安慰說話都比起醫護人員講嘅黎得更加真實更有說服力，因為當前要行嘅路前人都行過哂；當刻嘅痛苦經歷大家都捱過左。大家嘅你一言我一語親身見證比起成仟蚊一粒嘅止痛藥更湊效，比左我無比嘅勇氣繼續向前行，一步一腳印，行到522日之後嘅今日，完成左6針化療同18支標靶，感恩🙏🏼
在此要再次感謝會長Jacqueline呢位小天使，將眾多師姐師妹凝聚起黎，成立一個冇任何資助嘅病人組織，不斷無私為乳癌患者謀福祉，love you！You're amazing!
此外仲有台柱大師姐Ada, Cynthia 同Anita 無私嘅分享及見證，亦感激喺治療其間曾經同行遇上嘅姊妹，有難題一齊研究，互訴心聲。最後想對正在徬徨無助嘅姊妹講一句：「有病就醫，人間有愛。We're not alone! 加油！」 🥰
#乳您一起youarenotalone
#乳您一起畢業感言
#化療經歷
#確診時感受