<Winnie畢業了>
還記得Winnie搵我時, 佢仲好擔心10歲既女女, 因為都懂事了, 可能會因為媽媽患病而悲傷, 可能會出現陰影, 呢點我非常明白, 我確診時仔仔都係11歲, 當時我都好擔心點樣同仔講, 幸好我同Winnie一樣, 最後都順利渡過, 佢女女仲好乖, 好懂事.
做媽媽既, 確診後, 顧慮既唔只係自己身體, 仲要諗埋家中長輩, 要佢地擔心, 家中小朋友會唔會有陰影, 公司會唔會唔support, 家務, 照顧小朋友既安排等等.....睇睇下, 都係將自己排到最後, 我地真係要學習啊! 救人前係先自救.
Winnie, 恭喜你畢業呀! 三陰常令人覺得世界末日, 好差好差, 但我地group好返既姊妹有好多好多好多, 我地一齊努力, 祝福你健康到老, 以後開開心心, 我地繼續手拖手以生命影響生命😘😘
Winnie的畢業文👩🏻🎓
昨天2022年4月6日打埋最後一支升白針💉為我療程畫上句號，療程既48支升白針，真係難忘，由上年10月發現個胸有粒野，醫生照完話粒野唔係好野，叫我做定心理準備，當下眼淚已擁出黎，大女10歲，細仔未夠兩歲，40頭就乳癌??心情一下跌落谷底，但好快同自己講，為左對仔女，我唔可以驚唔可以怕，有病就醫有癌咪切走佢囉，我有天父，我信佢一定比出路我既，之後好快抽針➡️確診➡️手術➡️結果係三陰...又一次晴天霹靂，但幸好pet ct 結果我淋巴冇感染冇擴散其他地方，感謝主!
初初對乳癌一無所知，對三陰呢個名感到好害怕，但恐懼就係黎自無知（from 會長名言），感恩搵到You're not alone認識到會長，加我入3.0 group，再入埋三陰谷，大西北，當見到大家分享好多乳癌資訊及經歷，姊妹們感人既畢業文，令我對乳多左好多認識，亦唔再恐懼，了解多左，讓我呢4個月既抗癌路完全不感到孤單。
感謝三陰谷同大西北既姊妹，每當我落完針有唔舒服，係谷度呻時，姊妹們都比好多鼓勵，教我好多方法同食療去舒緩落針後不適，感謝同期既姊妹互相扶持同鼓勵，感謝有你地陪我走過呢段路，感受到大家好有愛💕
療程中更加感謝神隊友，兼顧工作之餘更要幫手照顧兩個細路，家姐仔呢段時間亦變得更懂事，幫手照顧細佬陪細佬玩，呢段抗疫+抗癌時間真係唔易過，一家人一齊正面面對，回望返呢4個月既化療，肉體上係有辛苦既時候，但心靈上感恩既事情更加多，感謝主一直保守，讓我在抗癌路上得到很多支援，支持及鼓勵!
希望我既經歷都可以造就身邊既人，原來抗癌並不可怕，㊗️福療程中既姊妹，人生既每一步都一定有出路，我地一定可以手拖手到老，一齊加油，迎接同享受我地既第二人生💝🏆
#youarenotalone
#乳您一起畢業感言
#化療經歷
#以生命影響生命