今日立春，亦係May既畢業
點解我鼓勵姊妹寫畢業感言呢？係因為學習面對，將心入面既感受寫出黎，係一種舒發，亦可以藉由佢地既故事去鼓勵同路人，等新人知道好多成功例子，一定會過去的😘😘
May，過程不簡單，但你做到了，記得要好好咁多謝自己，好好咁多謝自己身體陪伴你打左場漂亮既硬仗，以後要健健康康開開心心啊🥰祝福你😘😘
***************************
終於到我出畢業文了~ 長文慎入~🙏
我今日終於完成埋電療了, 今日係立春, 一年之始, 亦係我邁進第二人生的新開始, 雖然之後仲要每月打停經針和食荷爾蒙藥, 但我已經當自己完成哂治療, 我好返哂架喇~😊
回想上年7月30日在qe上午確診, 下午就即刻去私家揾馬醫生, 個心好亂又好想快d切走衰野, 因為其實由發現摸到有粒野, 到確診係拖左一年, 好驚已擴散, 所以姑娘一話可插期, 我就乜都唔諗好趕咁約了2日後就做手術, 本來話7成機會可局切, 最後都要全切+肚重建, 好記得手術醒左, 話我知前哨淋巴有一粒感染, 切左淋巴, 我真係好驚擴散了, 一出手術室, 我老公一直拖住我手, 上返病房後我話我多謝佢, 我手術冇事, 只要唔洗死就得了, 佢突然喊得好厲害, 呢個畫面真係一世都記得~😭
我好多謝我最好的朋友阿寶, 我地由幼稚園識到而家, 因為我唔敢話比阿爸阿媽知, 佢比左最大的支持和關懷我, 佢陪我術前見醫生, 送我入手術室, 我做手術做左8個鐘到零晨12點幾, 佢都一直在手術室門口等我出黎, 有一個咁好既閨蜜係我一生既福氣~💝
仲有好多謝我兩個家姐, 住院期間日日照顧我, 又話錢方面唔洗擔心, 仲有佢地幫我將我患癌消息告知爸媽, 手術後幾天, 我突然收到媽咪電話, 第一下就聽到媽咪喊, 我都即係喊, 佢地年紀大我好驚佢地接受唔到, 到同阿爸講電話, 佢都居然喊, 我由細到大係未見過我爸喊的, 我好震驚, 但好彩佢地比我想像堅強, 我知道佢地真係好錫我, 我真係好愛佢地~ 我患病期間, 真係覺得原來自己好幸福, 有好多錫我對我好的人~❤
好多謝會長Jacqueline加我入group😘, 其實我本身都算樂觀底, 但入左group有咁多姊妹的鼓勵和support, 心中就更加堅强, 令我勇往直前, 打走唒d衰野, 拜拜佢條尾~ 因為有呢group, 每日追post, 有好多資訊又有得吹水, 治療的日子真係過得好快~
特別嗚謝電兔Ada, 係你令我知道原來化療都可以咁活躍咁正常, 仲可以咁靚🥰, 當時因為你, 我先有動力去執返下自己化返個妝出街~ 同埋你真係好正能量, 好好記性和好有心去幫大家解答各種疑難~
仲有多謝JoJo, 因為你成日send d食好西既相出黎, 令我知道原來可以唔洗日日食得咁清, 我跟你回魂後就去食燒肉/打邊爐/食蝦😋😂, 偶然出去食下好野真係令我在化療期間開心好多~
都多謝呢個group所有姊妹, 大家都好有愛好好, 每次打針都得到大家鼓勵支持, 有問題大家都積極幫助解答, 好人一世平安, 祝願姊妹們以後都健健康康, 幸福快樂, 大家一起手拖手到老！❣
#youarenotalone
#乳您一起畢業感言