4月17日
繼續心情又興奮又擔心但又期待, 0900準時到達HKIOC抽血, 然後食個早餐就返去等消息.
我一去到就等唔切見醫生, 先搵姑娘問下有結果未, 白血球合唔合格, 結果係合格✌🏻可以順利打埋呢針就畢業啦, 我尋晚預先打定感謝詞, post去我個人facebook, 等知道我事既朋友同屋企人安心, 我順利完成啦.
心情真係無法形容, 好似自己考完一個好重要既試, 可以劃上一個句號, 好感恩, 好激動, 好感動, 真係好多謝老公, 仔女, 父母, 屋企人, 朋友喺呢段路上一直既支持, 冇你地我冇可能行得咁順利, 好多謝你地呀.
***我一直用樂觀, 感恩既態度去行呢段路, 其實都好想分享比同路人, 我地係一定會順利行過的, 我選擇勇往直前去走, 雖然我唔係教徒，但將生命交託比天父, 我相信佢會選擇一條最適合我既路, 將我既生命交比佢, 只要無悔過每一天, 那怕有一日佢要接我走, 我已無悔地走完人生既路, 亦表示天父認為我已完成任務, 開開心心咁回天家嘆世界, 所以唔需要想太多, 我過完化療, 儘管仲有電療, 標靶同5年既荷爾蒙藥, 我都當自己好返架啦, 但我會檢討過去, 以後要更愛自己, 開心地過每一天, 大家一齊努力呀!
#youarenotalone
#乳您一起畢業感言