傷殘津貼 & $2八達通:
尋日姊妹們都討論今個月咁早就出傷殘津貼, 但只得$1770
係呢到分享下, 有癌症係可以申請傷殘津貼, 交通津貼, 仲有$2 八達通啊!
傷殘津貼有$1770, 再加$285交通津貼, 因為今個月傷殘津貼有雙糧出啊! 但交津係冇, 所以出左$1770先, 20號先再出$2055, 即今個月出$3825, 有啲人覺得好少, 我就覺得好心足, 病係我自己, 呢啲錢係意外之財, 雪中送炭, 一點心意, 我總係向好方向想, 開心好多.
點申請呢? 當你知道自己有癌症時, 無論你私家定政府做治療都好, 盡快去政府登記, 第一次見醫生時記得記得要提出想申請傷殘津貼, 醫生會幫你填form同簽名, 綜合各姊妹講解, 每間醫院做法都唔同, 我喺東區醫院係醫生填form再直接寄去福利署跟進, 有啲醫院做法係由醫生填左再直接交比病人交去醫院社工, 批左後會有2封信寄比你, 1封係確認批幾耐份殘津貼, 一般半年至1年不等 (冇準則, 睇醫生決定); 另1封係傷殘八達通既申請表, 填好後交去就近既地鐵站詢問署, 大約6星期就以掛號寄到黎比你架啦